სამუშაო საათები 10:00 - 19:00
თბილისი - უფასო მიწოდება
• მთავარი • პროდუქცია ანბანის მიხედვით • ფასდაკლება • შეკვეთა საიტიდან • ქალაქები სადაც ვაწვდით • რეკვიზიტები / კონტაქტი
 

პოდაგრა

პოდაგრის სამკურნალო ბუნებრივი და მცენარეული საშუალებები და მათზე დამზადებული საკვები დანამატები.

პოდაგრის შესახებ

პოდაგრას (ხალხში ნიკრისის ქარი) ეწოდება, რემვატული ხასიათის დაავადებას, რომელსაც იწვევს ურატების (შარდმჟავას მარილები) დაგროვება ორგანიზმში, კერძოდ სახსრებსა და თირკმელებში. დაავადების სიმპტომია, უეცარი, შეტევითი ხასიათის, ძლიერი ტკივილი, რომელიც გარკვეული დროის შემდეგ ისევ უეცრად ქრება.

პოდაგრის მიშვებული ფორმებისას წარმოიშობა ტოფუსები - კვანძები, რომლებიც იწვევს სახსრების დეფორმაციას. გარდა ამისა, ხდება თირკმელების ჩათრევაც და ვითარდება თირკმლების უკმარისობა და თირკმელკენჭოვანი დაავადება.

პოდაგრის მკურნალობის პროცესი მოიცავს: ტკივილის და ანთების მოხსნას (გლუკოკორტიკოიდების, ანალგეტიკების და არასტეროიდული ანთების საწინააღმდეგო საშუალებების გამოყენებით), კვების რაციონის ნორმალიზებას და სისხლში შარდმჟავას დონის შემცირებას.

პოდაგრის კლასიფიკაცია

გამოყოფენ დაავადების სამ ფორმას:

  • თირკმელური ფორმა;
  • მეტაბოლური ფორმა;
  • შერეული ფორმა;

პოდაგრის გამომწვევი მიზეზები

პოდაგრას მიაკუთვნებენ ასაკობრივ დაავადებებს. ის ხშირ შემთხვევაში შეინიშნება 65 წელს გადაცილებულ პაციენტებში. ბავშვებში და ახალგაზრდებში ის ძალიან იშვიათად ვითარდება. უფრო მეტად კი, პოდაგრა მამაკაცებში ვლინდება, ვიდრე ქალებში, ეს იმით აიხსნება, რომ მამაკაცების სისხლში გაცილებით მეტი ურატებია ვიდრე ქალებში. ქალებში დაავადების განვითარების რისკი იზრდება მენოპაუზის შემდეგ.

დაავადების გამომწვევი ერთ-ერთი მთავარი მიზეზია არასწორი კვება (წითელი ხორცის, მწარე, ცხიმიანი და შემწვარი საკვებისა და ალკოჰოლის გადამეტებული მიღება).

გარდა ამისა, დაავადების პროვოცირება შეუძლია შემდეგ ფაქტორებს:

  • ცხოვრების უმოძრაო წესი;
  • წონის უეცარი კლება, რომელიც გამოწვეულია არასწორად შერჩეული დიეტით ან მძიმე დაავადებით;
  • თამბაქოს მოხმარება;
  • შარდმდენების, აცეტილსალიცილის მჟავის ხანგრძლივი უკონტროლო მიღება;
  • ჰორმონალური დარღვევები (კლიმაქსი ქალბატონებში);
  • სახსრების გამუდმებული მიკრო ტრავმები.

გარეგანი ფაქტორების გარდა, არსებობს დაავადების გამომწვევი შინაგანი ფაქტორებიც. მათ შორისაა:

  • თირკმელების დაავადებები;
  • შაქრიანი დიაბეტი;
  • კენჭები ნაღვლის ბუშტში ან თირკმელებში;
  • ჰიპოთირეოზი;
  • მაღალი არტერიული წნევა;
  • მემკვიდრეობითი ფაქტორი;
  • სისხლში ქოლესტერინის მაღალი შემცველობა;
  • ბრონქული ასთმა, ფსორიაზი, ეგზემა და სხვა დაავადებები, რომლებიც დაკავშირებულია ალერგიულ რეაქციებთან.

პოდაგრის სიმპტომები

ყველაზე ხშირად პოდაგრა ვლინდება ფეხის ცერა თითის სახსარზე. გარდა ამისა, ის შეიძლება გამოვლინდეს იდაყვის, თითების, ხელის მტევნის, მუხლის და ტერფის სახსრებზე.

დაავადების მწვავე ფორმა სწრაფად ვითარდება. დაავადებულ სახსარზე ვლინდება ძლიერი ტკივილი, დაზიანების ადგილას კანი ჰიპერემიული და მტკივნეულია. ტკივილი იმდენად ძლიერია, რომ პატიენტისთვის დაავადებული სახსრის არეზე პლედის შეხებაც კი შეიძლება გაუსაძლისი იყოს. ასევე, შეინიშნება სხეულის ტემპერატურის მატება.

პოდაგრის შეტევა ცხრება რამდენიმე საათში ან დღეში, მკურნალობის კურსის ჩატარების ან თავისთავად. ხანდახან, შეტევა რამდენიმე კვირასაც გრძელდება.

დროთა განმავლობაში, შარდმჟავას კრისტალები ილექება სახსრების გარშემო მცირე ზომის, სითხით სავსე, ნაპრალებში, რამაც შეიძლება გამოიწვიოს ანთება და ბურსიტი, რომელიც თავს იჩენს დაზიანებული სახსრის შეშუპებასა და ტკივილში.

მკურნალობის გარეშე, პოდაგრა იწვევს სახსრების ქრონიკულ ანთებას, რომლის დროსაც შარდმჟავას კრისტალები ილექება კვანძების სახით (ტოფუსები) სხეულის რბილ ქსოვილებში. ტოფუსები შეიძლება განლაგდეს სხეულის ნებისმიერ ნაწილზე, მაგრამ ყველაზე ხშირად მათი ლოკალიზაციის ადგილებია თითები, ცერა თითის გარშემო არსებული სივრცე და იდაყვების სახსრები.

პოდაგრის დიაგნოსტიკა

დაავადების დიაგნოსტიკა მოიცავს შემდეგ პროცედურებს:

  • ანამნეზის შეგროვება, პაციენტის გამოკითხვა და დათვალიერება;
  • სისხლის ანალიზი (საერთო, ბიოქიმიური);
  • შარდის ანალიზი (საერთო, ბიოქიმიური);
  • სახსრის სითხის ბაქტერიოლოგიური და ტოფუსების შემადგენლობის ანალიზი.

წინასწარი დიაგნოზის დასაზუსტებლად შეიძლება დაინიშნოს აპარატურული კვლევები:

  • დაზარალებული სახსრების რენტგენოგრაფია;
  • მაგნიტურ-რეზონანსული ტომოგრაფია;
  • სკინტიგრაფია;
  • ექოსკოპია.

ძალზე მნიშვნელოვანია დიფერენციალური დიაგნოსტიკის ჩატარება, რადგან პოდაგრა ხშირად ერევათ ართროზსა და ართრიტში.

პოდაგრის შემთხვევაში შეინიშნება შემდეგი სურათი:

  • ძალიან ძლიერი, შეტევითი ხასიათის ტკივილი დაავადებულ სახსარში;
  • პოდაგირის პროგრესთან ერთად სიმპტომებიც სწრაფად ძლირდება;
  • თავიდან შეინიშნება მხოლოდ ერთი სახსრის დაავადება;
  • სინოვიალურ სითხეში არ შეინიშნება პათოგენური მიკროფლორა;
  • ავადდება ფეხის ცერა თითის სახსარი, რომელიც შესიებული და ჰიპერემიულია.

პოდაგრის მკურნალობა

პოდაგრის დროს სრული გამოჯანმრთელება ძალიან ძნელია. თუმცა, შესაძლებელია დაავადების პროგრესის შეჩერება და ანთებისა და ტკივილის მოხსნა.

დაავადების მკურნალობის ძირითადი ეტაპებია:

ტკივილის სწრაფი მოხსნა. ამ მიზნით პაციენტს ენიშნება:

არასტეროიდული ანთების საწინააღმდეგო საშუალებები;

გლუკოკორტიკოსტეროიდები - ინიშნება არასტეროიდული ანთების საწინააღმდეგო პრეპარატების არაეფექტურობის ან დანიშვნის შეუძლებლობის შემთხვევაში. მისი მიღება ხდება პერორალურად ან სახსარში შეყვანით. მათი დანიშვნა შეუძლია მხოლოდ მკურნალ ექიმს. თვითნებურად მათი მიღება დაუშვებელი და შეიძლება გამოიწვიოს მრავალი მწვავე გართულება.

გართულებების და პოდაგრის განმეორებითი შეტევების პრევენცია. ეს მიზანი მიიღწევა ორგანიზმში შარდმჟავის დონის შემცირებით. არსებობს მედიკამენტების ორი ტიპი, რომლებიც ამცირებენ შარდმჟავის დონეს:

პრეპარატები, რომლებიც ხელს უშლიან შარდმჟავას სინთეზს;

პრეპარატები, რომლებიც ხელს უწყობენ შარდმჟავას გამოყოფას თირკმელებით.

პრეპარატები უნდა შეარჩიოს მკურნალმა ექიმმა, პაციენტის ინდივიდუალური მახასიათებლებიდან და დაავადების მიმდინარეობიდან გამომდინარე.

მკურნალობის სწორად წარმართვის შემთხვევაში პროგნოზი დადებითია. მკურნალობის არქონის შემთხვევაში შეიძლება განვითარდეს გართულებები (თირკმლის უკმარისობა, თირკმელკენჭოვანი დაავადება და არტერიული ჰიპერტენზია).

ხალხური მედიცინა და პოდაგრა

ხალხურ მედიცინას და შესაბამისი რეცეპტურით შექმნილ პრეპარატებს სასწაულების მოხდენა შეუძლია. ისინი არამხოლოდ ეფექტური, არამედ ადვილი გამოსაყენებლებიცაა. გთავაზობთ, გაეცნოთ პოდაგრის სამკურნალო და პროფილაქტიკურ დროში გამოცდილ და ეფექტურ რეცეპტებს.

პოდაგრის მკურნალობა ხალხური მეთოდებით

პოდაგრა – ძირძველი დაავადებაა, რომლის სამკურნალო არაერთი ხალხური რეცეპტია შემონახული. სამკურნალოდ გამოიყენება ბალახები და ნატურალური კომპონენტები ან მათი კომბინაციები ნახარშების, ნაყენები და მაზების სახით. ხალხურ საშუალებებს შეუძლია შეაჩეროს დაავადების განვითარება, მოხსნას ტკივილი და დაიცვას ორგანიზმი მისი განვითარებისგან.

ოთხი რეცეპტი ფიტოთერაპევტისგან:

პოდაგრით დაავადებული სახსრების დასამშვიდებლად მზადდება გვირილის ნახარში. ყვავილებს (100 გ.) ესხმება წყალი (10 ლ.), ემატება მარილი (20 გ.). მასა ყენდება და შემდეგ გამოიყენება სამკურნალო აბაზანების სახით.

სახსრების განწმენდაში დაგეხმარებათ ნაძვის გაუხსნელი გირჩები თესლებით. 1,5 ჭიქა მდუღარე წყალზე იღებენ 1 გირჩს. ნაყენი კეთდება საღამოს და ჩერდება მთელი ღამე. მიიღება დღეში სამჯერ ჭამამდე ნახევარი საათით ადრე, გამოჯანმრთელებამდე.

სახსრების გასაწმენდად გამოიყენება დაფნის ფოთოლიც. 1,5 ჭიქა წყალში იყრება 5 გ. დაფნის ფოთოლი და თავღია ჭურჭელში იხარშება 5 წუთი. შემდეგ, ჭურჭელს ეფარება თავსახური, იფუთება თბილად და ჩერდება სულ მცირე 3 საათის განმავლობაში. მიიღება დღის განმავლობაში.

სახსრების გაწმენდა შეუძლია მოხარშულ ბრინჯსაც, რომელსაც თავისებური მომზადების წესი აქვს. 2 ს.კ. ბრინჯი ირეცხება და იყრება ნახევარ ლიტრიან ქილაში, ასხავენ წყალს და აჩერებენ დილამდე. შემდეგ ბრინჯი კვლავ ირეცხება და მიჰყავთ ადუღებამდე. წამოდუღებული ბრინჯი კიდევ ირეცხება და კვლავ ადუღებამდე მიჰყავთ. ასე კეთდება 4-ჯერ. ბოლოს, ბრინჯი კვლავ ირეცხება და იჭმება ზეთისა და მარილის გარეშე. ჭამის შემდეგ 4 საათის განმავლობაში არ შეიძლება არაფრის ჭამა და დალევა. მკურნალობის ხანგრძლივობაა 45 დღე.

მარილების დაშლა და გამოყოფა შავი თალგამის წვენის გამოყენებით:

შავი თალგამის წვენი ისმება 1 ჩ.კ. ჭამიდან 1 საათის შემდეგ. თანდათანობით, თუ არ შეინიშნება გვერდითი მოვლენები და ტკივილი ღვიძლის არეში, იზრდება დოზირება 0,5 ჭიქამდე. მკურნალობის დროს არ შეიძლება მწარე და მჟავე პრდუქტების მიღება. როდესაც, დალეული წვენის საერთო რაოდენობა აღწევს 3 ლიტრს მკურნალობის პროცესი ჩერდება.

1 ჩ.კ. ენდროს ფესვებს ალბობენ 1 ჭიქა ადუღებულ წყალში, აყენებენ ან ადუღებენ ორთქლზე 10 წუთი. მიიღება დილა-საღამოს 0,5 ჭიქა.

3 ფლაკონ კატაბალახას ხსნარს ერევა 1 ფლაკონი სამმაგი ოდეკოლონი და ჩერდება მთელი ღამის განმავლობაში. ნაზავი გამოიყენება გარეგანი დამუშავებისთვის. დაავადებული სახსარი მუშავდება საღამოს, იფუთება პოლიეთილენის ფირით და თბილი ქსოვილით. პროცედურა მეორდება რამდენიმე დღე.

სიცხე და სიცივე - მეთოდი, რომელიც გამოიგონეს იაპონიაში. მკურნალობისთვის გამოიყენება ორი ჭურჭელი: ერთი ყინულიანი წყლით, მეორე კი - ნებისმიერი მოხარშული მარცვლეულით. პროცედურის შემდეგ ხელის ან ფეხის სახსარს ფუთავენ შალის ნაჭრით. ამ მეთოდით ორ-სამ თვიანი მკურნალობა კარგ შედეგს იძლევა.

სალა იჭრება ისეთ ნაჭრებად, რომ თითო თითზე მოთავსდეს პატარა ნაჭერი. შემდეგ ამ ნაჭრებს შეიზელენ მანამ, სანამ ისინი ზომაში არ შემცირდებიან. მუდმივი ტკივილების დროს, რეკომენდირებულია სალის მთელი ღამით გაჩერება. სასარგებლოა ხორბლის ფაფის ჭამა კარაქით ერთი კვირის განმავლობაში, რის შემდეგაც შეგიძლიათ გადახვიდეთ რძის ფაფაზე.

მალამო, მზადდება უმარილო კარაქისა და ალკოჰოლისგან. პროდუქტებს იღებენ თანაბარი პროპორციებით. ზეთი ცხელდება ქაფის მდგომარეობამდე, იხსნება ცეცხლიდან და ემატება სპირტი, შემდეგ სპირტს უკიდებენ ცეცხლს, სპირტის სრული დაწვის შემდეგ დარჩენილ მასას ათავსებენ ქილაში და ინახავენ მაცივარში. მასა შეიზილება მტკივან სახსარზე ტკივილის გაქრობამდე.

ფეხის ძვლებზე წანაზარდების მოსაშორებლად გამოდგება იოდის აბაზანები. იოდის 9 წვეთი და 3 ჩაის კოვზი სოდა ემატება 3 ლ. წყალს. 10 საღამოს განმავლობაში ჩატარებული მკურნალობის შემდეგ შეამჩნევთ გაუმჯობესებას.

ხახვის წვნიანი მზადდება 2-3 ხახვის თავისგან და 1 ლ. წყლისგან. ხახვს კანიანად ხარშავენ სრულ ჩახარშვამდე. მიიღება 10-15 დღის განმავლობაში თითო ჭიქა დღეში სამჯერ ჭამამდე.

თანაბარი პროპორციებით ავიღოთ მდოგვის ფხვნილი, თაფლი და საჭმელი სოდა, გადავურიოთ და შევიზილოთ, ორთქლზე წინასწარ გახურებულ სახსარზე. შევფუთოთ თბილი ნაჭრით და გავიჩეროთ მთელი ღამე. კომპრესი კეთდება ყოველღამე ორი კვირის განმავლობაში.

პოდაგრის პროფილაქტიკა

პროფილაქტიკის ძირითადი მეთოდებია:

  • სწორი კვება;
  • ცხოვრების უმოძრაო წესზე უარის თქმა;
  • კომფორტული ფეხსაცმლის ტარება;
  • მავნე ჩვევებზე უარის თქმა;
  • წონის კონტროლი;
  • იმ დაავადებების დროული მკურნალობა, რომლებმაც შეიძლება გამოიწვიოს პოდაგრა;
  • სამკურნალო პრეპარატების უკონტროლო მიღებისგან თავის შეკავება (მაგალითად, ასპირინის);
  • შრომისა და დასვენების რეჟიმის მოწესრიგება;
  • სტრესისგან თავის დაცვა;
  • დღეში მინიმუმ 1,5-2 ლიტრი წყლის დალევა;
  • პროფილაქტიკური სამედიცინო შემოწმების რეგულარული გავლა. ეს შესაძლებელს ხდის, დაავადება ადრეულ ეტაპზე გამოვლინდეს და მოხდეს შესაბამისი მკურნალობის დროული დანიშვნა.
 
სამუშაო საათები
ორშაბათი -კვირა 10:00 - 19:00
Mail: Mwvanemcenareebi@gmail.com TEL: +995597760989 TEL: +995597989878 TEL: +995595832828 TEL: +995599382038
დაგვიკავშირდით
დაგვირეკეთ სამუშაო საათებში და ჩვენი ოპერატორები დიდი სიამოვნებით უპასუხებენ თქვენთვის საინტერესო კითხვებს.

© საიტზე განთავსებული ინფორმაცია კერძო საკუთრებაა და დაკოპირების შემთხვევაში დაგეკისრებათ პასუხისმგებლობა.