ბაბუაწვერას ფესვი, მასზე დამზადებული მცენარეული დანამატები და ორგანიზმისთვის სასარგებლო პროდუქტები.

ვეგეტატიური განვითარების პერიოდში ბაბუაწვერა უამრავ სასარგებლო ნივთიერებას აგროვებს თავის ფესვთა სისტემაში, რის გამოც ხალხურ მედიცინაში ის ძალიან ფასობს. მცენარის სხვა ნაწილების მსგავსად, ფესვი ფართოდ გამოიყენება სხვადასხვა სამკურნალო ნახარშების, ნაყენების, მალამოებისა და ლოსიონების მოსამზადებლად სახლის პირობებში. მათი გამოყენება შესაძლებელია ცალკე, ან სხვა წამლებთან ერთად, მათ შორის ფარმაცევტულ პროდუქტებთან, ამ უკანასკნელ შემთხვევაში ბაბუაწვერას ფესვი გააძლიერებს სხვა წამლების სასარგებლო ეფექტს და დაეხმარება ორგანიზმს დაავადების უფრო სწრაფად დამარცხებაში.

ბაბუაწვერას ფესვი გამოიყენება კოსმეტოლოგიაშიც. მისი გამოყენებით შეგიძლიათ, მარტივად აღადგინოთ კანის ელასტიურობა და სილამაზე, მოიცილოთ კოსმეტიკური დეფექტები და გახადოთ თმა უფრო სქელი და მორჩილი.

შემადგენლობა

ბაბუაწვერას ფესვი შეიცავს ბევრ სასარგებლო ნივთიერებას, მაგალითად:

ინულინი. ეს არის ბუნებრივი პოლისაქარიდი, რომელიც შეიცავს 95% ფრუქტოზას. ინულინი ბუნებრივად ამცირებს სისხლში შაქარს, შლის ტოქსინებს და აძლიერებს ორგანიზმს მთლიანობაში;

სიმწარე. ხელს უწყობს კუჭის წვენის გამოყოფას და ასტიმულირებს მადას. ობსტრუქციული ბრონქიტის დროს ხელს უწყობს ნახველის ამოღებას;

ტერპენის ნაერთები. აქვთ ანტიბაქტერიული და სიცხის დამწევი ეფექტი;

გლიცერიდები. ამცირებენ სისხლში ქოლესტერინს, იზიდავენ და ორგანიზმიდან გამოაქვთ ცხიმში ხსნადი ტოქსინები;

ქოლინი. ააქტიურებს ჰემოგლობინის გამომუშავებას, მონაწილეობს ქოლესტერინის დაშლაში, აუმჯობესებს იმუნიტეტს, იცავს ღვიძლს ტოქსიკური ნივთიერებების და ალკოჰოლის მავნე ზემოქმედებისგან;

კაროტონოიდები. იცავენ მხედველობას და აწესრიგებენ ნივთიერებათა ცვლას;

სტერინი. გააჩნიათ შარდმდენი და ნაღველმდენი ეფექტი;

მიკროელემენტების კომპლექსი. მიკროელემენტები აღადგენს პლაზმისა და სისხლის მჟავა-ტუტოვან ბალანსს, რითაც ზრდის იმუნიტეტს და აუმჯობესებს საკვებით მიღებული ნივთიერებების ათვისებას.

გამოყენების სპექტრი

ბაბუაწვერას ფესვისგან დამზადებული საშუალებები დამხმარეა შემდეგი დაავადებების დროს:

• დიაბეტი;
• გასტრიტი დაბალი მჟავიანობით;
• ნაღვლის ბუშტის და პანკრეასის დაავადებები;
• ქრონიკული ყაბზობა;
• ჰეპატიტი;
• კანის პრობლემები (აკნე, ძირმაგარა, რომლებიც წარმოიქმნება მეტაბოლური დარღვევების შედეგად);
• ნერვული სისტემის დარღვევები;
• უმადობა;
• ალერგია;
• პოდაგრა;
• ანემია;
• ასთენია;
• ელენთის დაავადებები;
• მეტეორიზმი;
• ცისტიტი;
• პანკრეატიტი;
• ფურუნკულოზი;
• ვიტამინების დეფიციტი;
• ლიმფური სისტემის ფუნქციონირების უკმარისობა;
• ჭიები;
• ქალებში ლაქტაციის პერიოდში რძის ნაკლებობა, მშობიარობის შემდგომი დეპრესია;
• რევმატიზმი;
• ადენოიდების ანთება;
• ათეროსკლეროზი, გულსისხლძარღვთა სისტემის დაავადებები;
• სტომატიტი, გინგივიტი;
• ანგინა.

სასარგებლო თვისებები

ბაბუაწვერას ფესვს გააჩნია შემდეგი სასარგებლო მოქმედება ორგანიზმზე:

მატონიზირებელი, დამამშვიდებელი და ძილის გამაუმჯობესებელი. ეს თვისებები კომბინაციაში სასარგებლოა სხვადასხვა ნერვული აშლილობის, ცუდი განწყობის და უძილობის სამკურნალოდ;

საფაღარათო. ფესვს გააჩნია რბილი შემამსუბუქებელი ეფექტი და აწესრიგებს კუჭის მოქმედებას;

შარდმდენი, ნაღველმდენი. ნაღვლის მომატებული სეკრეციისა და შარდმდენი ეფექტის გამო, ბაბუაწვერას ფესვი ასუფთავებს შინაგან ორგანოებს და აღადგენს მათ გამართულ მუშაობას;

ოფლმდენი და სიცხის დამწევი. ამ თვისებების გამო, ბაბუაწვერას ფესვისგან დამზადებულ პრეპარატებს წარმატებით იყენებენ ინფექციური, ვირუსული და გაციებით გამოწვეული დაავადებების სამკურნალოდ;

გამწმენდი. ბაბუაწვერას ფესვი ეფექტურად აშორებს ორგანიზმიდან ტოქსინებს, შლაკებს და მავნე ქიმიკატებს;

ამოსახველებელი. ეფექტურად ათხელებს და აშორებს ფლეგმას სასუნთქი სისტემიდან, რითაც ხელს უშლის ბრონქებში და ფილტვებში ანთებითი პროცესის წარმოქმნას;

სპაზმოლიზური, ტკივილგამაყუჩებელი. საშუალება ხსნის ტკივილს და სპაზმს და ამსუბუქებს ავადმყოფის მდგომარეობას.

გამოყენების მეთოდები

შინაგანი მიღებისთვის ბაბუაწვერას ფესვისგან მზადდება სხვადასხვა სახის ნახარშები და ნაყენები, დაავადებების ტიპის მიხედვით.

მადის მოსამატებლად, ღვიძლის, ნაღვლის და თირკმლის დაავადებების აგრეთვე, პოდაგრის, გასტრიტის კოლიკის, ყაბზობის დროს:

1 ს.კ დაფქული ბაბუაწვერას ფესვი ჩავყაროთ თერმოსში, დავასხათ 1 ჭიქა მდუღარე წყალი და გავაჩეროთ 2 საათი. შემდეგ, მასა გადავწუროთ და ნარჩენი გავწუროთ მარლაში. სასმელი მივიღოთ ცივად, ჭიქის მეოთხედი, დღეში 3-4-ჯერ ჭამამდე ნახევარი საათით ადრე.

გაციების, ხველის, კანზე გამონაყარის და ძირმაგარას სამკურნალო, ასევე მეძუძური დედების ლაქტაციის გასაუმჯობესებელი საშუალება შეგიძლიათ მოამზადოთ შემდეგი ორი მეთოდით:

ნაყენი: 1 ს.კ. დაფქულ ბაბუაწვერას ფესვს დავასხათ 1 ჭიქა მდუღარე წყალი, დავახუროთ ჭურჭელს თავი და გავაჩეროთ 1 საათი. მივიღოთ ნახევარი ჭიქა დღეში 3-ჯერ, ჭამამდე ნახევარი საათით ადრე.

ნახარში: 1 ს.კ. ფესვს დავასხათ 1 ჭიქა მდუღარე წყალი, დავდგათ ორთქლის აბაზანაზე და გავაჩეროთ ნახევარი საათი. შემდეგ, გადმოვდგათ და მივცეთ 10 წუთი გაგრილების საშუალება, გადავწუროთ და ნარჩენი კარგად გავწუროთ მარლაში, დავამატოთ მდუღარე წყალი და მივიყვანოთ პირვანდელ რაოდენობამდე. მივიღოთ 50 მლ. დღეში 3-ჯერ ჭამამდე ნახევარი საათით ადრე.

პირის ღრუში ანთებითი პროცესების მკურნალობა: რეკომენდებულია პირის ღრუს რეგულარული გამორეცხვა ბაბუაწვერას ფესვების ნახარშით. მომზადების რეცეპტს არ აქვს მნიშვნელობა.

ადენოიდები და ქრონიკული რინიტი: სამკურნალო ხსნარის მოსამზადებლად ავიღოთ 1 ჩ.კ. გამომშრალი ფესვი, დავასხათ 200 მლ. მდუღარე წყალი, ჭურჭელს დავახუროთ თავი და გავაჩეროთ 20 წთ. გავაცივოთ, გადავწუროთ და მივიღოთ ჭიქის მეოთხედი დღეში 3-ჯერ.

სტრესი, ზოგადი სისუსტე, უძილობა: გაგიუმჯობესებთ განწყობას და ზოგად მდგომარეობას შემდეგი რეცეპტით მომზადებული ნაყენი: 1 ს.კ. ფესვს დავასხათ 1 ჭიქა სპირტი ან არაყი, ჭურჭელს მჭიდროდ დავახუროთ სახურავი და გავაჩეროთ 2 კვირა ბნელ ადგილას. შემდეგ გადავწუროთ და ნარჩენი გავწუროთ მარლით. მივიღოთ 30 წვეთი, დღეში 3-ჯერ, ჭამამდე. კურსის ხანგრძლივობა 14-20 დღე.

შლაკების გამოდევნა, რევმატიზმი და სკლეროზი: მშრალი ფესვი დავფქვათ და მივიღოთ 2 გ. ერთ მიღებაზე. დავაყოლოთ წყალი. მასა მივიღოთ დღეში 3-ჯერ ნახევარი საათით ადრე.

ბაბუაწვერას ფესვი და კოსმეტოლოგია. ეს პროდუქტი ძალზე ეფექტურია პიგმეტური ლაქების მოსაშორებლად. სამკურნალო სითხის მოსამზადებლად ავიღოთ 2 ს.კ. ბაბუაწვერას ფესვი, დავასხათ 300 მლ. მდუღარე წყალი და გავაცხელოთ 30 წთ. ორთქლის აბაზანაზე. გავაგრილოთ, გადავწუროთ და ნარჩენი გავწუროთ მარლით. ბამბის დისკი დავასველოთ ხსნარში და გავიწმინდოთ კანი დღეში რამდენჯერმე. სწრაფი ეფექტისთვის რეკომენდირებულია პროცედურის 15 წუთის განმავლობაში ჩატარება.

თმებისთვის, ფესვისგან ამზადებენ ე.წ. „პუდრას“, რისთვისაც ფესვს ფქვავენ ფქვილის კონდიციამდე. ამ მასას უმატებენ შამპუნს, ნიღაბს და ბალზამს, რათა თმა უფრო მორჩილი და გლუვი გახდეს. გარდა ამისა, თუ „პუდრს“ დავუმატებთ მცენარეულ ზეთს, მივიღებთ კანის გაღიზიანების შესანიშნავ სამკურნალო საშუალებას.

გაფრთხილება

შეიძლება აღინიშნოს ინდივიდუალური აუტანლობა.

არ გამოიყენოთ თუ გაქვთ ქოლელითიაზი, კუჭის წყლული.